Embla Food Award fór av bakkastokki fyri fyrstu ferð í ár. Talan er um príshandanir sum vera latnar teimum norðurlensku londunum, ið á ymsar hættir skara framúr og skapa nýtt innanfyri matframleiðslu.

Sjey heiðurslønir vera latnir hvørt ár: "Mat til børn og ung", "Mathandverk", "Mat til mongdir", "Matsamskifti", "Matferðamál", "Rávøruframleiðsla" og "Matíverksetan".

Av hesum sjey heiðurslønum fóru Føroyar avstað við ikki minni enn trimum:

"Mathandverk" vann kokkurin Leif Sørensen, fyri sínu serligu røstu fiskakips. "Matferðamál" vann skipanin Heimablídni, sum Anna og Óli Rubeksen umboðaðu. Síðsti prísurin var "Rávøruframleiðsla" sum Eva og Jógvan Jón av Dímunargørðum vunnu.

Umframt hesar tríggjar prísirnir var kendi sjónvarpskokkurin, Gutti Winther, eisini tilnevndur til heiðurslønina "Matsamskifti" fyri sendingina "Fisk og Skips".

Av hinum norðanlondunum vann Geitmyra Matkultursenter í Noregi heiðurslønina "Mat til børn og ung", Annika Unt úr Svøríki vann "Mat til mongdir" heiðurslønina, Micheal Björklund frá Smakbyn í Álandi vann heiðurslønina "Matsamskifti", og Thomas Snellman frá REKO í Finnlandi vann heiðurslønina "Matíverksetan".

Danmark og Ísland vunnu ongar heiðurslønir á ársins Embla Food Award. Føroyingar, harafturímóti, gjørdust teir heilt stóru vinnararnir.